सदाशिवरावभाऊनी दिल्लीचे तख्त फोडल्याच्या आनंदाला
पानिपतचा पराभव विरजण लावतो
संयुक्त महाराष्ट्राचा कलश डोक्यावर घेऊन नाचताना
बेळगाव कारवार चा डाग मनामध्ये सलतो
मराठी मराठी माणूस दुसरा काय असतो …
चर्चगेट लोकलच्या दांडीला लोंबकळून डुलकी काढताना
चढलेल्या सेन्सेक्सच्या गप्पा मी फक्त ऐकतो
चिरंजीवांच्या गणिताच्या प्रगतीचा उतरत आलेख बघताना
भविष्यातल्या नोकरीच्या चिंतेने रात्ररात्र जागवतो
मराठी मराठी माणूस दुसरा काय असतो …
मेनूकार्डावर काहीही न लिहिणाऱ्या उडप्याकडे मी पाठ फिरवतो
आणि माझ्यापरीने महाराष्ट्रधर्म जागवतो
तांबे-चितळे-पणशीकर यांच्याकडे हट्टाने खरेदी करताना
पाट्या सूचना अपमानातून मराठी बाण्याचे धडे गिरवतो
मराठी मराठी माणूस दुसरा काय असतो …
धीरूभाई अंबानींचे चरित्र मी विकत घेऊन वाचतो
शेजारचा शहा त्याचे परीक्षण माझ्याकडून ऐकतो
दिवाळीच्या लाक्षामिपूजानाला तो दहा हजाराची लड लावतो
मी लवंगी फटका एक एक उडवतो
मराठी मराठी माणूस दुसरा काय असतो …
सचिन शून्यावर आउट झाला तरी तो सर्वश्रेष्ठच असतो
मराठी हद्दपार झाली तरी मी मुंबईवर प्रेम करतो
सातासमुद्रापलीकडे अटटाहासाने जमून मंडळ संस्था काढतो
छोटे छोटे प्रश्न तत्वाचे बनवत ई-मेल वरून वाद घालतो
मराठी मराठी माणूस आणखी वेगळा काय असतो …
कोणत्याही टिप्पण्या नाहीत:
टिप्पणी पोस्ट करा